Zuriñe Zorrozua: “Gero eta zailagoa izango da Estatuarentzat zigor-epaiak onartzea”

Uztaila 14th, 2012 by admin

D3M eta Askatasuna hautes-plataformen aurkako epaiketan auzipetuta egon eta gero Auzitegi Nazionalak absolbitu egin zuen orain dela hilabete beste 12 lagunekin batera. Epaitzeke dauden prozesu politikoetarako aurrekari juridikoa jarri dutela uste du errekaldetarrak eta hemendik aurrera absoluzio gehiago etorriko direla aurreikusten du.

 

Ekainaren 18an Auzitegi Nazionalak D3M eta Askatasuneko 13 kideak absolbitzea erabaki zuen. Nola hartu zenuten absoluzioa?

Poz handiz. Gehienbat denak izan ginelako absolbituak. Beste gauza bat izango litzateke batzuk absolbituak izatea eta beste batzuk ez, eta aukera guztiak mahai gainean zeuden. Epaia ikusita oso ondo arrazoituta dago, arrazoiak pisuzkoak eta argiak dira, baina egia da ere boto partikular bat egon dela, beraz, pentsa liteke epaimahaiaren osaketak ahalbidetu duela epaia. Beste epaile batzuk egonez gero epaia kontrakoa izan zitekeen eta denak kartzelatuak izatea.

Alde horretatik poz handia sentitu genuen eta norberak bere bizitzara begiratuta lasaitasun itzela jaso dugu.

Azkenaldian prozesu politikoen aurkako epaiek hartu duten norabidea ikusita esperantzarik al zenuten kargurik gabe aske geratzea?

Hor bi errealitate daude beti. Bata, epaiketa berak eman zuena, hau da, berau abiatzeko arrazoirik ez egotea. Eta bestea prozesuan zehar aurkeztutako frogak eta argudioak lirateke. Azken horiek ikusita logikoena denak absolbitzea izango litzateke. Baina azken hilabeteetan kaleratutako epaiak ikusita, Bateragune auzia, Nafarroako gazteen aurkakoa eta abar… gehienok pentsatzen genuen aukera handiak genituela kondenatuak izateko.

Arantza Urkaregik esan zuen epaiketan agerian geratu zela auzipetuen aurkako frogarik ez zegoela eta Fiskaltzaren galderek prozesuaren irrealitatea erakusten zutela.

Gure aurka aurkeztutako frogak prentsaurrekoetara joatea edo bileretan parte hartzea ziren. Baina epaian bertan ere hori esaten da eta egiatzat hartzen dira, baina epaileak dio hori ez dela delitua. Guk gainera ez genuen inoiz ukatu hori egiten genuenik. Onartu egin dugu parte hartze politikoa genuela, baina epaiak dio: “bai, hori dena egiten zuten, baina horrek ez du esan nahi delitua denik”.

Epaia irakurrita ere nekez ulertzen da zuen arteko lotura.

Totum revolutum bat egin dute. Gutako askok ez genuen elkar ezagutzen prozesua hasi aurretik. Bakoitzaren historialetik zati batzuk hartu, denak bildu eta pieza bat osatu dute, orduan zeharka hainbat lagun sartu dituzte.

Nire kasuan, esaterako, beste sumario batzuetan auzipetuta zegoen jendearekin ibiltzen nintzenez, nik ere horrekin harremana izan behar nuela defendatzen zuten. Eta alderantziz, nirekin zebiltzana ni auzipetuta nagoen auziarekin lotuta egon behar zuela, alegia.

D3Mri buruz gutxi hitz egin da epaiketan.

Bai, asko hitz egin zen herri plataformen inguruan, Herria Aurrera, Gasteiz Izan… ANVri buruz ere asko hitz egin zen, baina D3M ia ez da inondik ageri. Badirudi D3M aitzakia izan zela une hartan (2009an) hauteskundeak baldintzatzeko. Aldiz, prozesuak aurrera egin ahala pieza horretan egon garen pertsonak auzipetzeko D3M erabili izan dute, askok ez baikenuen harremanik.

Jada absolbituta zaudete baina oraindik hainbat prozesu daude egiteke. Nondik joan daitezke?

Epaiari begiratzen badiogu guk egindako lana berez delitua ez dela esaten da. Alderdien legearen barruan politika egitea ez dago delitu gisa tipifikatuta. Hor esaten da elementu subjetibo bat behar dela eta ez dagoela frogatuta ETArekin harremana zegoenik. Dena ETA da esatearekin ez da nahikoa, frogatu beharra dago.

Hala ere, epaimahaiaren osaketarekin “zortea” izan dugula komentatu dugu gure artean. Baina oraindik ere epailetzan badira Estatuak erabiltzen dituen epaile asko. Gure kasuan Nicolas Poveda izan da (aurkako bozka eman zuen), baina badira beste batzuk. Eta hurrengo emaitzak horren araberakoak izan daitezke, estrategiaren araberakoak. Ikusi beharko da beraiek (Estatuak) ere zer erritmo markatzen duten, zer epaiketa ateratzen duten, hor “izoztuta” uzten duten…

Epaiak dio hautes-plataforma bat sustatzeak ez duela zertan loturarik izan erakunde armatu baten helburuekin. Bada, zentzu horretan, epaiak mugarria ezartzen duela esan daiteke.

Juridikoki aurrekari bat da, beste kontu bat da maila politikoan haien interesa zein izango den. Alderdi edo plataforma bat legez kanporatzeko egiten den lehen epaiketa izan da gurea. EHAK edo ANV aurretik legez kanporatu bazituzten ere gurea izan da lehen epaiketa.

Politikoki begiratuta, ikusi beharko da prozesu osoa nondik doan, eta horren arabera batzuetan alde batera joko dute eta beste batzuetan bestera.

Epaiketa Euskal Herrian irabazi dela diozue. Zergatik?

Epaiketa hau orain dela bi urte egin izan balute emaitza oso bestelakoa izango litzateke ziurrenik. Euskal Herriak azken hiruzpalau urtetan egin duen ibilbideak beste giro sozial bat egotea ahalbidetu du, guk babes zabalagoa izan dugu…

18/98 prozesuarekin alderatuta, nahiz eta gure auzia askoz txikiagoa izan, mobilizazio soziala horren handia izan barik babes zabalagoa lortu dugu, gizarteko beste eremu batzuetara zabaldu da eta lortu dugun indar bilketa ere oso handia izan da. Giroa ere ezberdina da eta Estatuak ez dauka horrenbesteko tarterik nahi duena egiteko Euskal Herrian. Euskal Herriak esan du honaino heldu gara eta zuek ere mugitu behar duzue. Manifestazio nazionaletan bildutako jendetza, Eleak-en inguruan sortutako giroa, auzo eta herrietan egindako lana… denak lagundu du.

Zuen kasua aintzat hartuta zein uste duzu izan daitekeela etorkizuna?

Euskal Herrian martxan dagoen prozesuak aurrera egin ahala, gero eta zailago izango dute zigor-epaiak lortzea. Badakigu erabakia ere politikoa dela, baina tartea gero eta txikiagoa izango da eurentzat, gero eta zailago izango dute.

Badakigu behin prozesua irekita dagoenean epaiketak egin beharko dituztela, baina gure aurrekari juridikoa eta Euskal Herrian bizi den giroa ikusita oso zaila izan behar du zigorrak ezartzea. Beti bezala, badaude salbuespenak, badaude Estatu mailako auziak, “cuestiones de Estado” delakoak, Bateragune auzia bezala. Halere, nik uste gero eta zailago izango zaiela zigor-epaiak onartzea.

• Posted in Politika, Uncategorized
• No Comments
• Tags: Askatasuna, Auzitegi Nazionalak, Branka, D3M, elkarrizketa, epaiketa, Zuriñe Zorrozua